خالد على يكتب: صلاح ومانى وعوامل الفوز بأمم إفريقيا
ليه محمد صلاح مكسبش ولا بطولة مع منتخب مصر مع إن مانى كسب بطولتين مع السنغال؟
عوامل الفوز بأي بطولة كثيرة، لا تتوقف عند شخص واحد فقط. ليونيل ميسي عندما كسب كأس العالم، لم يكن في أفضل مستوياته وكان يشطب الكرة، ولكن عوامل المنظومة الكاملة ساعدته ليكسب كأس العالم وقبلها الكوبا. العوامل دي تُقاس بالمنظومة كاملة، بالإسكواد الذي معك.
أنت مثلاً لو أحضرت جوارديولا ليمسك سموحة، هل سيأخذ الدوري؟ طب لو أحضرت هالاند ليلعب مع زد، هل سيأخذون الدوري؟ أكيد لا طبعًا. الإسكواد يفرق في رتم اللعب، وفي تحمل الضغوط، وفي لاعبين تشيلك عندما تكون في أسوأ حالاتك في ماتش.
وهنا نبدأ نقارن بين إسكواد السنغال وإسكواد مصر، وطبعًا مقارنة محسومة لأسود التيرانجا والفروق الفردية واضحة؛ لاعبون في أكبر دوريات العالم، ومتأسسون في أوروبا وطالعون محترفين من قبل عُمْر صلاح نفسه، لاعبون يلعبون بمنظومة، وعندما يحتاجون فروقًا فردية يكونون في الموعد.
شوف إسكواد السنغال والمستويات التي يلعبون ضدها عاملة إزاي، منظومة المغرب نفسها -الأفضل في أفريقيا- خسرت منها فاينال تاريخي وعلى أرضها، ومعهم دياز والزلزولي وحكيمي ومزراوي وبونو والنصيري ورحيمي، وليلة كبيرة، فمحدش يقولي ماني كسب كل دول لوحده. ساديو مثلاً عندما يصنع أسيست يجد نيكولاس جاكسون الذي كان مهاجم تشيلسي الأساسي، صلاح عندما يصنع الأسيست لأسامة فيصل الذي تاريخه في البنك الأهلي.
حد هيقولي ايه علاقة الاسكواد بالأداء الفردي لمحمد صلاح، وإنه مش بيجري ولا بيهين نفسه في الملعب؟ هقولك دي بقى وجهات نظر، صلاح في ليفربول هو صلاح في المنتخب، عمري ما شوفته بيعمل تأكلينه، الراجل بينزل يدافع بشكل طبيعي زي اي لاعيب مهاجم مش مطلوب منه يبقى مدافع جبار يعني، بينزل يقف ويقابل ويحاول يضغط، زي ليفربول بالظبط، وفي امم افريقيا الاخيرة دي كان بيتواجد عند ال ١٨ بتاعتنا اكتر من ١٨ الخصوم، علشان طريقة اللعب
الارتداد والسرعات، الناس ناسية ان صلاح بقى 34 سنة، مش هو صلاح أبو 24 سنة، ودي سنة الحياة والكورة، كريستيانو رونالدو دلوقتي مش هو رونالدو بسرعات زمان، وصلاح لما كان في 2017 هداف تصفيات كاس العالم، وكان روح وجرينتا مش طبيعية وكلنا شوفنا لقطته الشهيرة في ماتش الكونغو لما وقع وقام وقالهم العبوا يلا هنكسب، بس الناس نسيت وافتكرت ماني لما قال هيا نعود ونلعب كالرجال وصلاح ييجي يتعلم منه، مع إن صلاح عاملها قبله في 2017 وصعدنا كاس عالم
الحاجة الأخيرة.. هو ايه الإنجاز ؟ اني اكسب أفريقي وخلاص؟ جورج ويا ماكسبش افريقيا أصلا صعد بليبريا مرة واحدة أمم أفريقيا ولإنهم مكانوش بيصعدوا فده إنجاز، ماني كسب أفريقيا مرتين لانهم مكانوش بيكسبوها فده إنجاز، لكن محدش قال عندهم صعدنا كاس عالم وده انجاز.. صلاح صعدنا كاس عالم، او هقول شارك في صعودنا كاس عالم علشان فيه محنكين، وأيوه ده إنجاز لإنك أصلًا ماكنتش بتصعد بقالك 28 سنة، وبالنسبة لأمم الأفريقيا فأنت وصلت نهائي مرتين وخسرتهم منهم واحد ضربات جزاء، ووصلت مرة سيني فاينال وخسرت بجول في وقت حساس، حاولت كتير وربنا ماوفقكش، بس وفق مثلًا جيل 2006 في ضربات جزاء النهائي أمام الكوت ديفوار، وده مايقللش منهم جيل قوي وجامد اوي في كل المراكز وكانت سمته الجماعية مش جيل ابو تريكة ولا زيدان ولا متعب ولا حسني
الخلاصة.. محمد صلاح أسطورة حاول بشرف يبسطك كمصري جنسيتك في جواز سفرك نفس جنسيته، وانت كنت بتتريق على اصابته قبل كاس العالم، وانت من سنين بتركب ساديو ماني عليه، وفي المطار بتقابله بكلمات ماتطلعش غير بني آدم وضيع، جرأته السوشيال ميديا على أنجح لاعب كرة مصري على وجه الأرض، لكن سيظل الملك المصري، واللي عمل تاريخ ماتعملش قبل كده، ويارب نلاقي لاعيبه تعدي تاريخه، حاول واجتهد مع المنتخب وحقق ارقام فردية كتير وحقق انجاز الصعود لكاس العالم، وإن شاء الله ربنا يكرمه ويحقق مع المنتخب أفريقيا في يوم من الأيام حتى لو زي ميسي كده وهو في أواخر أيامه في الكورة
